Дерригача дунен туризма Ди дездеш хилар вай лоамашка
Жӏайрахьа кхален моттигашка туризма ха дӏакъовлар Дерригача дунен туризма денца хеттар вай мехка. Лейми яхача юртарча «Оаздик» лагере хилар из цӏай. Бахархошта, хьаьшашта лаьрхӏа йоккха программа вӏашагӏъеллаяр мехкарча цу оагӏонцарча министерствос. Цу юкъе яр спортацара яхьаш, экскурсеш, иштта кхыдраш.
«Яхьашка дакъа лоацаш, гӏаш лоаман моттигашка гӏолла экскурси еш, кавадроциклаш хехкаш бар доакъашхой. Лаьрххӏа программа кийчъяьяр цу цӏайга республикерча паччахьалкхен филармоне. «Дега оаз», «Гаргареи» яхача ансамблий доакъашхой бар цига, шоай начӏал гойташ. Кхетаче дакъа лоацаш яр культуран, туризма гӏулакхех йолча министерствон хьалха латта Лаьнанаькъан Залина», - «Сердалога» из хоам кхаьчар мехкарча Паччахьалкхера.
Вай мехкара хозал йовза безам бола туристаш, хьаьший Жӏайрахьа кхален моттигашта тӏалатташ ба. Шеко яц, цкъа цигара ӏалам, лоамаш, гӏалай юрташ бӏаргаяйнар кхы а юхава чам болаш хургхиларах.
Дӏадахача шера беркате йола лоаме йовза баьхкараш 600 эзар совгӏа нах бар. Цул совгӏа, арахьара тӏалатта хьаьший боацаш, вай мехкара дезалца арабаьнна салаӏа, цӏенача фега багӏаш ха яккха ловраш а лоаман моттигаш хоржаш хул массахана.
