Гӏалгӏайчен лоаме «АСМ Групп» говзанчашта, теркам тIаозаш йола хӏама корайир
«АСМ Групп» яхача меттаоттаяра болх лелабеча тоабан говзанчашта «Къоаст» яхача Гӏалгӏайчен лоаман юкъерча бӏаьшерен гӏалай комплексе болаш корайир ца йохаш дика йиса, тӏехнахьа говзанчий «С.Я. Анцупова Cmn» кеп тӏайола исторически кирпишк.
Архивни каьхаташ хиларах, эксперташта хайра из арахийцар малав. Из хилар Сергей Яковлевич Анцупов, Терски областа, Шолжа кхален Эбарга-Юрта хиннача станица еттача кирпишка, машина кирпишка (черепица) завода кулгалхо. Из предприяти белгалъеш я 1904 шера «Терски календара тӏа». Из йоккха а хиннаяц - шера цо беш бола пайда паччахьла ханашкара 300 сом хиннад, болх бераш верригаш а 7 саг мара хиннавац.
1907 шерга кхоачаш, «Ерригача Россе фабрикан-завода, кулгаца беча балха промышленноста адресни книжка» тӏа деча йоазонга диллача, болхлой 8 сагага кхоачаш мара хиннабац цига. Цудухьа тохкамхой таро хилар из кирпишк Эбарга-Юрта хиннача станице арахецаш а, духхьала цига бахача наха мара лаьрхӏа а хиннайоацилга ха.
Цунца тамашийнагӏа дерз халача моттигашка уллача юрта из дӏакхачара дош. Цо тохкамхошта хьалхашка, ХХ бӏаьшере йолалуш Гӏалгӏайчен лоаман кхале, шаьрача моттиге яьдача станицашта юкъера экономически бувзамах лаьца керда хаттараш оттаду.
