«Аькхенаькъан Хасолтá вахари кхоллами» яха гойтам ба, Паччахьалкхен галерее дӏахьош
Аькхенаькъан Хасолта вахара наькъах, кхолламах дувцаш бола гойтам хьабийллар, гойтама Паччахьалкхен галерее. Автора дукхача шерашка хьакхеллача балхий истори довзаргда цига. Лакха начӏал хиннача суртанча къаман исторецара, культурацара бувзам бовзийташ моттиг я из.
«Басарашца болх беш суртанчаш ба вайна, дегаца яздераш а ба, хӏаьта Аькхенаькъан Хасолта шоллагӏбарех вар. Мехкарча лоамий низ, хозал, гонахьара тамашийна хоза ӏалам довзийташ вар из вайна ший балхашка гӏолла. Суртанча хиларал совгӏа, ӏилманхо волаш, къахьийгар цо мехка. Ший тайпара оамал, сабар долаш хиннача воккхача говзанчас шийна тӏехьа дита балхаш къаман вахаре йизза моттиг дӏалаьца, дуккханешта довзаш, лоархӏаш да. Къаьстта дог тохадолийташ да вай мехкарча беркатеча ӏалама моттигаш йовзийташ, «кӏай кийнаш тухка» лоамаш шоаш ма дарра хьагойташ цо кхелла сурташ. Гуш да, ше хьаийца никъ лоархӏаш, из гӏулакх дега дезаденна, хьамсара долаш из хиннилга», - дийцар «Сердалога» гойтам дӏахьош хиннараша.
Аькхенаькъан Хасолта вахара, кхоллама никъ бовзийтача гойтаме дукха хӏама довза, дега тоам бе аьттув ба бахархой. Шийна тӏехьа сийрда лар йитача воккхача говзанчас ший нигат, уйлаш, син низ боккхача безамца яздаьча сурташка дитад вайна. Хьажархошца, ший кхоллам лоархӏарашца; сурташка гӏолла къамаьл деш ва автор; гуш да, хӏара болх цун дега лоархӏаме хиннилга.
