«Къаьнара ГӀалгӀайче» яха тха гойтам, музея тамашийна оагӀонаш гойташ ба. Цига хьажа венача сага гургда къаьнара гӀалгӀай Ӏадаташ, хьалхале лелаеш болча суртанчий тамаш яйташ дола, къаьнарча вай даьй вахар гойташ дола балхаш, цар даьхкача сурташка гӀолла го йиш я уж.

Гойтаме керттера терко тӀаозаш да, ГӀалгӀайчен доазон тӀа археологе тохкамаш деча хана корадаь кердадараш», - яхаш дийцар «Сердало» газетага Паччахьалкхен исбахьален искусствай музея кулгалхочо ТӀумхой Любас. 

ДӀаяхача ханашка вай даьша леладаь къаьнара культуран, Ӏадаташ гойт цига. Укхаза го йиш я хӀара денна цӀагӀа эшаш хинна оатхалаш, хозаленаш, бӀаьшерашка цар лелаяь хӀамаш, герзаш. Къаьстта терко тӀаозаш я, къаман куц гойташ йола искусство. Масала, гӀалгӀай кӀувсаш-истингаш даьд чоалхане гахьар долаш, къаьгача сийрдача сурташца.

«Къаьнара ГӀалгӀайче» яхача гойтаме наха гойтаргда гаьнарча ханашка баьхача вай даьй хинна вахар, цар кулгаговзал. Уж гӀалгӀай исторе эггара чӀоагӀагӀа лораде деза хӀамаш да; дӀахо говзанчашта, искусство езарашта накъадаргдолаш а да.