ИнгГУ дӏахьоргья, Мутаӏаланаькъан Хьаж-Бийкара 115 шу дизара хетаяь, хоза дешарий яхь
Гӏалгӏай паччахьалкхен университета филологически факультета гӏалгӏай метта кафедро дӏакхайкадир, цӏихезача гӏалгӏай поэта Мутаӏаланаькъан Шовхала Хьаж-Бийкара 115 шу дузаш хилара хетаяь, хоза дешарий яхь дӏахьош хилар. Цу яхье дакъа лаца таро йолаш ба, университета ерригача факультетий студенташ. Цар кийчо е еза Мутаӏаланаькъан Хьаж-Бийкара гӏалгӏай меттала байташ ешара.
Йоазонхочун кхоллама никъ дӏаболабелар, гӏалгӏай поэзи хьакхеллача Беканаькъан Тембота кулгалца. 1930 шерашка цох хилар ше ӏомавенна йоазонхо, хӏаьта 40-ча шерашка, гӏалгӏай меттала яздерашта юкъе дикагӏчарех цаӏ вола поэт хилар цох. Цун кхолламе яр эггара лоархӏамечарех йола темаш: кердача вахарах, культурах, Даьхенцарча безамах, колхозаш дегӏайоагӏаш хиларах, коллективизацех. Къаьстта моттиг дӏалоацаш дар Граждански а, цул тӏехьагӏа Сийлахь-боккха Даьймехка тӏом а лаьттача шерашка гӏалгӏашта карагӏдаьнначох даь йоазош.
Поэта литературан тӏехьаленна чуйоагӏаш я «Керда хьаьший» яха поэма (1934), из лоархӏаме хилар гӏалгӏай литературе; дувцар «Сохӏийп» (1937) - из хьалхара хьож психологически дувцар язде гӏалгӏай меттала; цо иштта язъяьй пьесаш, дукха байташ, кӏоанолгаш.
Лоархӏаме дакъа юкъеденад Шовхала Хьаж-Бийкара гӏалгӏай багахбувцам лорабеча, дӏаязбеча даькъ тӏа. Осменаькъан Хьамзатеи цои «Гӏалгӏай багахбувцам» (1940) цхьана арахец. Мутаӏаланаькъан Хьаж-Бийкар дика вовзаш ва гӏалгӏай меттала цо даьча таржамашка гӏолла, эрсий классикий А.С. Пушкина, М.Ю. Лермонтова, Н.А. Некрасова, И.А. Крылова, иштта кхыбарий йоазош наьна меттала даьхад Хьаж-Бийкара.
