ИнгГУ кхетаче дIайихьар, къам мехкахдаккхара дагалоаттамца ювзаяь
Экономикан, урхаллен факультето; ГIалгIай паччахьалкхен университета чуйоагIача гуманитарно-технически колледжо цхьана дагалоаттама кхетаче дIайихьар; къам мехкахдаьккха Ди дагадохаш. Из ди лоархIаме да, Даьхен исторе оагIонга диллача хатара йоккха оагIув а я. Кхетаче дIахьош студенташа, хьехархоша сий дир, дагабохаш, цу Iазапе нийсбенна нах. Кхетачен доакъашхошта дагаухар исторически харцон моттигаш, иштта дийцар бIарчча дезалаш шоай цIенах, мехкахбоахаш ена хиннача къизалах.
«Дагалоаттама кхетачена юкъедоагIаш дар тематически къамаьлаш, исторически оагIонаш шоайла ювцар студенташа, цу тайпара халонаш къаманга кхы ца кхачийта, сага бокъонаш лорае езар, иштта хьежар дIаяхача ханарча кином моттигашка, сурташка.
Цига дакъа лоацаш хиннараша дуIа дир, дагабеха вай къам мехкахдаккхарах цу гаьнарча, хийрача мехка бейнараш», - аьлар «Сердало» газетага ИнгГУ.
Из болх вIашагIбеллараша белгалдир, къам мехкахдаккхар - из дIаяхача ханашка къаман тIакхаьча, цо лайна Iазап диц ца деш хилар, цунца цхьана хургдолчун кIийле чIоагIъяр да. Ноахалашта шоайла къамаьл де дика майда хилар цох.
