Исторически лоархӏам болча хӏамашта хетаяь семинар дӏахьоргья мехкарча НИИ
Лохера Пхьуй, Гирете яхача гӏалай юрташка археологашта кораяьча хӏамашта хетаяь ӏилман семинар дӏаяхьа лерхӏ ӏилма-тохкама институте. Къаман истореца лоархӏаме болх ба цига дӏахьоргбар.
«Лохера Пхьуй, Гирети яхача гӏалай юрташка тахан кораеш йола хӏамаш гӏалгӏай къаман истореца лоархӏаме бувзам болаш я. Цу моттигашка археологашта корайоагӏаш йола хӏамаш вайна массанена еза, боча хила езаш я, хӏана аьлча вай селханара истори да из.
Къаман ӏадаташ, культура йовзийташ, дуккха хӏамаш таханарча къонабарашта гучадоахаш йола хӏамаш я уж. Цу оагӏонца дувзаденнарех дувца лерхӏ семинаре», - дийцар «Сердалога» НИИ этнологех болча оагӏон кулгал деча, философех долча ӏилман кандидата Харсенаькъан Бориса. Семинар йистеяьлча, гӏалай юрташкара кораяьча хӏамашка хьожаргба берригаш.
