ИнгНИИ исбахьален таржамах, таржамхой балхах дувцаш семинар хилар
Ӏоахарганаькъан Ч. Цӏерагӏча гуманитарни ӏилма-тохкама институте дӏайихьар «Къаман литература дегӏадоаладара исбахьален таржамий лерхӏам» яхача темах семинар. Кхетаче дӏахьош яр «Литературни хьоашал» яхача института проекта чуйоагӏаш, из хетаяь яр Россе къамий меттай Ди хилара. Из болх вӏашагӏбеллар яр ИнгНИИ гӏалгӏай литература отдел. Семинара болх дӏаболабеш; доакъашхоша, хьаьшаша моаршал хаьттар ИнгНИИ кулгалхочунга Оздой Джамбулатага. Цо ший аргӏагӏа белгалдир цу тайпара кхетаченаш мотт дегӏабоалабара чӏоагӏа эшаш хилар. Къамаьл даьраша белгалдир таржамхой болх эшаш хилар, из балха оагӏув ма хулла дикагӏа дегӏайоалае езилга.
«Таржамхочо довзийт кхыча къаман дешархочоа къаман мах бараш. Уж оагӏонаш белгалйоал байташ е кхыдола йоазув кхыча меттала доаккхаш хилча. Тахан вай ӏемад искусственни интеллект таржама балха юкъеяккха, бакъда цо цӏаккха а дергдац сага деш дар», - аьлар ИнгНИИ гӏалгӏай литература отдела кулгалхочо Ноакастхой Хаважа.
«Исбахьален таржам культура дӏахо йоаржаяра гӏирс» яхача ший темага гӏолла цо бовзийтар исбахьален таржам дара лерхӏам, цу юкъе къаман литература дегӏадоаладара таржамхоша малагӏа дакъа лоац. Доклад еш цо иштта белгалдир, дӏаяхача ханашка, тахан вай къаман дукха ба нӏачал дола таржамхой, уж хилар бахьан долаш таржам даьд Пушкина, Лермонтова, Чуковске, Толстой, Есенина, Маяковске иштта кхыча дукхача йоазонхой балхашта. Таханарча таржамхошта юкъе дика таржам деш ба аьнна цӏи яьккхар Хамхой Дауда, Ваделанаькъан Ибрахӏима.
Иштта цига къамаьл дир ИнгНИИ гӏалгӏай литература отдела ӏилман болхлоша Ялхарой Марема, Итазанаькъан Дале.
Семинаре дакъа лоацаш хилар республикан йоазонхой Союза доакъашхой, хьехархой, студенташ.
