«Тахан хьежар ТӀой-Юртарча даькъ тӀарча дарбанченга фу хьал да. Из я 100 саг тӀаэцара, 60 саг дарба де Ӏовужавара лаьрхӀа моттиг. Керда, диазза вӀаштӀара яь дарбанчен гӀишло хьалъеш латт «УнахцӀено» яхача программага гӀолла. ХӀанз из 90% йистеяьннай. Из дарбанче хьаелла лерхӀ карарча шера оагӀой бетта. Дарба дара бола керда лорий гӀирс хьачубенаб», — аьлар, укх деношка ше къамаьл деш, ший телеграм-канале гӀолла ГӀалгӀай Республикан кулгалхочо Келаматанаькъан Махьмуд-Ӏаьлас. Цо белгалдир, ТӀой-Юртарча бахархошта из доккха совгӀат хилар. Федеральни а республикански а оагӀорахьара унахцӀенон программа кхоачашъеш хиларо таро хулийт, республикан юрташка бахача наьха могашал тоае.