«Се хьажа вахача хана, хьалхарча аргӀах терко тӀаяхийтар берий кхерамзлен Ӏалашо яь хилара, доазон тӀа лостам бара. Ӏаламо ше къахьийгад уж моттигаш хозъеш. Гобаьккха гувнаш, хьунаш, цӀена фо. Лагера доазон тӀа кхы а кӀотаргаш, гаьнаш дӀайогӀа еза.

Укхаза безаме а хоза а хила еза. Уж балхаш деш да «САФМАР» яхача Гуцаранаькъан Микаила дика гӀулакхаш дара йолча ганза чотах», - аьлар республикан кулгалхочо Келаматанаькъан Махьмуд-Ӏаьлас, ше цу гIишлон мах оттабеш.

Укхаза гӀишлонхоша дукха къахьийгад, деррига дика хилийта гӀерташ. Говзанчаша, болхлоша сантехникацара деррига гIулакхаш йистедаьхад, ток чуйиллай, хӀамаш юттача даькъ тӀара балхаш йистедаьхад. Кастлуш чура пенаш тоадеш бола болх дӀахьоргба.

Цу тайпара, лагерь дукхача бераша салаӀа йиш йолаш, тамашийна хоза Ӏалама моттиг хургья. Уж салоӀаш, ловзаш, керда низ чуболийташ хургба хозача гӀишлон чу, гобаьккха Ӏалама хозне а йолаш.