ГӀалгӀай мехка сий дир цӀихезача болхлой
Республике паччахьалкхен совгӀаташ луш, кхетаче дӀайихьар, цига цӀихезача бахархой къахьегам белгалбир ГӀалгӀайчен кулгалхочо Келаматанаькъан Махьмуд-Ӏаьлас. СовгӀаташ делар юкъарлон, политически болхлошта санна; дешара, унахцӀенон, бокъонаш лораяра, экономикан, культуран, спорта, СМИ даькъошка къахьегаш болча болхлошта а.
«Вай керттера лоархӀараш нах ба. Наха хьагойт хӀара денна лакха балха говзал, уж бехктокхаме ба шоай балха даькъах. Уж ба вай кагирхошта, иштта тӀехьа тӀадоагӀача ноахала масал гойтараш», - аьлар республикан кулгалхочо Келаматанаькъан Махьмуд-Ӏаьлас.
Мехка зарбан болх лелабераша баьча хоамах, совгӀаташ луш хиннарашта юкъе вар цӀихеза Россе Президента сийлен грамота енна лоткъамэцархо, ГӀалгӀай кулгалхочун дагавалар дола Къоастой Ӏийса.
Иштта физико-математически Ӏилмай доктора, «Физика» кафедра профессора, Матенаькъан Ахьмада «ГӀалгӀай Республикан цӀихеза Ӏилман болхло» яха цӀи елар.
Баркинхой Тамара я Ӏоахашканаькъан А.О. цӀерагӀча ИРКБ миай (сосуды) хирурге отделене кулгалхо, цунна елар «ГӀалгӀай Республикан цӀихеза лор» яха цӀи. Цул совгӀа, Галашкарча №2 йолча ишкола хьехархочунна Хучбаранаькъан Сарихата «ГӀалгӀай республикан цӀихеза хьехархо» яха цӀи елар.
Республикан 62 цӀихезача болхлочоа майдилгаш, сийлен грамоташ елар; цар шоай балха даькъ тӀа дика къахьегарах.
