Гӏалгӏай мехка бицлуц бӏухой-афганцаш
Пхьилекъонгий-Юртарча культуран Цӏагӏа лаьрххӏа йола кхетаче дӏайихьар, из хетаяь яр бӏухошта- интернационалисташта карагӏдаьнначоа. Цун керттера декхар дар Дагалоаттама Беша аллея дӏайолаяр. Из я халкъа лерхӏама белгало, иштта хьайийллар турпалхой-афганций сурташ дола мемориала оагӏув. Из проект кхоачашъеш яр Гӏалгӏайчен кулгалхочо Келаматанаькъан Махьмуд-Ӏаьлас тӏадиллача декхарах, иштта из хьаллаьцар Наьсарен кхален администраце кулгалхочо Исмейланаькъан Ӏамархана.
Цига беза хьаьший бар Наьсарен кхален депутатий совета кулгалхо Эккажанаькъан И., кхален администраце кулгалхочун гӏонча Бохтаранаькъан Х., вахара оагӏон кулгалхо Саганаькъан Мадина, «Афганистана, иштта СВО ветераний Российски Союза» моттигерча даькъа кулгалхо Мутаӏаланаькъан Г., Республикански халкъа кхоллама, цӏен исбахьален кулгалхо Абдурзакова А., Наьсарен кхален культуран Цӏен кулгалхо Дзейтанаькъан Т. Дагалоаттама болама юкъе иштта дакъа лоацаш хилар администраце, Пхьилекъонгий-Юрта юкъарлон кхела викалаш, кхален культуран-салоӏама моттигий кулгалхой, къоаной, дешархой. Юстара бисанзар «Хьалхарчар болам», «Россе Аьрзелгаш» яхача ерригроссийски проектий кагирхой», - аьлар «Сердало» газетага из болх вӏашагӏбеллараша.
Культуран Цӏен цӏагӏара хьахозаш дар Даьхе хестаеш дола иллеш. Уж дӏааьлар Гӏалгӏайчен цӏихезача артисташа Пхьугой Амира, Беканаькъан Хаде, Янарсанаькъан Л., Балайнаькъан М.
Дагалоаттама кхетаче чакхйоалаш, дина викалаша мовлат дийшар, бӏухой-афганций сийна.
Афгански тӏемах бола дагалоаттам, советски салтий денал даим дахаргда республикан бахархой дегашка.
