Гӏалгӏайчера госавтоинспектораш берашта наькъашка лелара бокъонаш хьехаш ба
Гӏалгӏайчен Госавтоинспектораша вӏашагӏбеллар берашца дӏабахьа беза болх. Цар берашта хьалхадоаккхаргда наькъа бокъонаш малагӏаш я, уж мишта лорае еза. Из болх къаьстта юххьанцарча классашка дагӏача берашца бе лаьрхӏад. Укх наькъа цар хержар Ӏаьлий-Юртара №21 йола ишкол. Цун керттера маӏан да, наькъа зуламаш нийслургдоацаш, бераш царех кӏалхардахар. Къамаьл деш наькъа полице болхлоша берашта дийцар керттерча наькъа бокъонех, къаьстта терко тӏаяхийтар гурахьа наькъ тӏара хьал массехк чоалхане дерзаш хилара, урамашка наькъал дехьабоалаш лорабала безара.
«Сердало» газетага республикан Госавтоинспекце болхлочо ма аллара, наькъа полицейскеша берашта хьалхадаьккхар, наькъал дехьабоалаш мишта лорабала беза. Бокъонцахьа машинаш юхасайца ца яьлча, «зебра» тӏа ког ловза йиш яц, аьлар цар. Цар иштта берашта могадир баьде йолча хана, къегаш дола гӏирсаш тӏадола барзкъа дувхар дика да, тӏаккха водителаша бераш дикагӏа зув.
Иштта дийцар пассажирашта йоагӏача бокъонех. Автоинспектораша хьалхадаьккхар, машинаца аравоалача хана, кхерамзлен тӏехкар дӏатеха хила дезилга.
«Уж пайда луш йола урокаш берашца каст-каста дӏахьош хилар бахьан да уж сакхетам болаш, бехктокхаме, наькъа хьал кхетадеш хилийтар», - аьлар тхоца къамаьл даьчо.
