Кагирхой туркхетаче дӏаяхьа кийчлуш ба мехка
«Гобаккхарал доккхагӏа» яха кагирхой туристически кхетаче дӏахьоргья вай мехка, укх бетта 20-ча денгара 23-ча денга кхаччалца. Къилбаседа Кавказа моттигашкара 150 хьинардар гуллургва цу доазон тӏа. Республикан квоташцара, каьхаташцара кийчон болх дӏаболабаьб тахан. «Сердалога» цох лаьца дийцар кагирхой цхьанкхетарий Цӏагӏа.
«Цхьанкхетара Российски юкъарло «Кхетам» яхача программага гӏолла лекцеш, семинараш дӏахьоргья цу деношка. Цу кхетаченашка, керттера спикер волаш, къамаьл деш хургва спорта гавзанча, спортивни туризма чемпион вола Мержой Константин.
Ши оагӏув ба доакъашхошта хержар. Лаьжгера кхуркхолг болча баха аьттув ба цар, е 3000 метр форда лакхерча Маьтлоам тӏа баргба уж.
Цу оагӏонцара кхерамзлен хьал лорадеш бола болхлой тӏахьожаш хургба цига. Сайрийна цӏи йийза гулбенна багӏа, вӏаший бовза, гобаккхарах шоаш хьаийцачох дувца аьттув хургба къонабарий.
СКФО къонабарашта юкъе спортивни оагӏонцара гобоаккхаш леларах; хьинаре, кадай хилар доаржадеш болх хургба ала деза. Вӏаший доттагӏал чӏоагӏде, цхьана мехкашта юкъера проекташ йоаржае, иштта пайдане хургдолча кхыдарашка гӏолла белгалбала аьттув хургба цар.
Вай мехкара хоза, беркате ӏалама моттигаш, лоаме йовзаргья царна. Туристически наькъаш довзаш, боккхача мехка наха уж бӏаргадайташ къахьегаргда.
