«Гаьге гӏалаш» яхача доазон тӏа боккха болх чакхбаккха лерхӏ, ер шу чакхдоалаш
«Гаьге гӏалаш» яхача ширача юрта боккха болх дӏахьош ба карарча хана. Жӏайрахьа кхале, Эса гаьна доацаш уллача доазон тӏа латта XVӏ бӏашерашкара гӏалаш гӏалгӏай тайпан – Гаьгенаькъан лоархӏаш хиннай. Тахка эттача доккха истори долаш моттиг я из. Тӏема гӏала, иштта цу гонахьара нах чубахаш хинна гӏалаш, моастагӏашта духьале еш хьалдаь пенаш тоадеш, юххьанца хиннача куца тӏа доаладеш, дӏабахьа безар боккха болх ба.
Петербургерча тоабо «АСМ Групп» кийчдаь да проекта каьхаташ. Дӏаяхача хана вай даьша хьабеш хиннар мо болча маркхалца дӏахьош ба болх, цу моттигий куц эггара хьалха хиннача хьала тӏа доаладе гӏерташ.
Къахьега дӏаболабалале, боккха ӏилман-тохкама болх дӏахьош хилар цига. Цу гӏулакхо гучадаьккхар доазон тӏа хьалха йовзаш ца хинна кхы а ийс гӏала йолга.
Цӏихезача мецената Гуцаранаькъан Микаила тӏахьожам беш, гӏо деш йолча «САФМАР» ганзага гӏолла дӏахьош ба из боккха болх.
Ер шу чакхдоалаш, чакхбаккха лерхӏ беррига болх. Белгалде деза, вай къаман исторега диллача, из хам баь, мах баь варгвоаца гӏулакх долга.
