«Ишколе даха кийчде бер» яха болам дӏаболабир мехка
Вай мехкадас Келаматанаькъан Махьмуд-Ӏаьлас белгалбаь хиннача, «Ишколе даха кийчде бер» яхача беркатеча боламо ший болх дӏаболабир республике. Наьсарен кхален культуран Цӏагӏа хилар хьалхара гӏа баккхар. Мехкара премьер-министр Сластенин Владимир а хилар, цига дакъа лоацаш. Укх шерарча кердадарех да цу оагӏонца дувзаденнарашта геттара чӏоагӏа терко яр. Дешархой тӏормеш кийчдеш хиннараша из болх берий ноаной дехараш теркалдеш, цар белгалдаьрашта тӏатайжа дӏабихьар. Яьннача ханага хьежжа хургья тӏормешка йоахка хӏамаш.
«Хӏара шера мехка боаржабеш болча «Ишколе даха кийчде бер» яха болам дӏаболабир тахан. Боламца чӏоагӏдаьр лоархӏаме декхар да: керда дешара шу долалуш, бер кийчде атта доацача наха гӏо де хьажар да из. Вай кхетаду, тов бетта 1-гӏа ди ишколе даха дезача хӏара бера дега лоархӏаме, ший тайпара доккха долга. Берашта цӏай да из; кердача, хозача хӏамашка, классерча берашца цхьана гулдаларга сатувсаш хул уж. Дешара шу дӏадоладе эшаш бола кхоачам ца тоъаш саготде дезаш ма хилда вай мехкара цхьаккха бер. Дешара тӏехьа аьттув хилба вай берий, хӏаьта даьй, ноаной дуккха бахьанаш хилда шоай йиӏигех, кӏаьнкех доаккхал де!» - аьлар Сластенин Владимира.
Укх шерарча болама юкъегӏоргва 5 эзар совгӏа саг, царна юкъе ба тӏема операце доакъашхой дезалаш, таро дика йоацача цӏагӏара бераш, дегӏа могашал эшаеннараш. Цул совгӏа, эшаш мел бола кхоачам чубола 100 дешархочун тӏормиг Запорожски областа Токмакски кхале ӏокхоачаргба. Мехкарча муниципальни моттигашка дӏа-хьа дахьийтад тӏормеш, оттадаьча каьхатага хьожаш, дӏадекъаргда уж дезалашта.
