Пунчена духьала маьхий тохаш болх ба мехка дӏаболабаь
Шелал хьаоттарца, пунчена духьала маьхий тохаш болх ба вай мехка дӏаболабаь. Республикерча дарбанчешка хьакхаьчай 40 эзарга кхоачаш «Совигрипп» яха Российски вакцина. «Сердалога» из хоам цу оагӏонцарча министерствера бера.
Шийла денош хьаэттача лазар даржаргдоацаш, пунчи хьакхийттача сага хьал кхераме хургдоацаш, тохаш да маьхий.
Лораша белгалдечох, маха теха 2-3 кӏира даьнначул тӏехьагӏа чӏоагӏлу пунчена духьалара дегӏа хьал, цунга хьежжа, лазар геттара даржарга ца а хьежаш, ханнахьа дӏатӏабаха, маьхий тохара тӏахьех цар бахархой. Къаьстта лоархӏаме да из берашта, дегӏаца цхьалха боацача кхалнаха, ха яхача наха, иштта дегӏаца цхьацца лазараш дарашта.
Эггара хьалхарча оагӏонца маьхий тоха дезарех ба дарбанчешка, вахара оагӏонцарча моттигашка къахьегараш, хӏара дийнахьа дукхача нахаца бувзаме болаш болх бе безараш.
Ше вахача шахьаре, юрта поликлинике е амбулаторе, ФАПа маьхий тохача кабинете дӏатӏаваха, мах боацаш маха дӏадохийта аьттув ба хӏаране.
