Шоай балха тӏа белгалбаьнна тохкама оагӏонцара эпсараш безбир мехка
Мехкарча МВД белгалбир, шоай гӏулакхе толашагӏа бола тохкама оагӏонцара къахьегамхой. Из хоам «Сердалога» бир цу моттигера.
Россе МВД тохкама оагӏон моттигаш хьакхелла 63 шу дизар дездеш йола кхетаче дӏайихьар мехкарча МВД.
Цига дакъа лоацаш бар мехкарча Паччахьалкхен кулгал деш вола Сластенин Владимир, Халкъа Гуллама депутат Йовлой Мухажар, мехкарча чурча гӏулакхий Министерствон хьалха латта полице инарал-майор Котов Владимир», - йоах тхога бенача хоамо.
Мехкадаьгара Келаматанаькъан Махьмуд-ӏаьлагара даькъалбийцар Сластенин Владимира тохкама оагӏонца къахьегараш. Цига белгалдир, цу оагӏонцарча къахьегамхой болх тахан чӏоагӏа лоархӏаме болга.
Ший болхлоех - таханарча ден турпалхоех дувцаш, Котов Владимира белгалдир тохкамхошта хьалхашка латта декхараш геттара чӏоагӏа фийла хила везарех долга.
Зуламхой гучабахара, царна йоагӏаш йола кхел яра тӏехьа чӏоагӏа лоархӏаме ба къаьстта цу къахьегамхой болх. Толашагӏа болча болхлошта совгӏаташ делар цига.
Россе МВД амарца ший декхараш деналца, боаггӏача боараме кхоачашде хьожаш хьавоагӏача Наьсарерча Россе ОМВД оагӏон тохкамхо, юстице воккхагӏа вола лейтенант Чиймарзанаькъан Амир «Деналца декхараш кхоачашдарах» йола майдилг луш белгалвир.
Халкъа Гуллама, мехкарча Паччахьалкхен Лоархӏаме грамоташ елар бархӏ тохкамхочоа. МВД Лоархӏаме грамоташ елар ворхӏ эпсара, итт тохкама оагӏон болхлошта доккха баркал кхайкадир.
Кхетаче йистейоалаш доккха баркал аьлар мехкарча керттерча полице болхлочо мехкадаьна, Паччахьалкхен, депутатски корпуса массахана шоай балха терко лоаттаеш , бувзам болаш хиларах. Белгалбаь болхлой дӏахойодача хана а иштта хьинаре, деналца, бехктокхаме къахьегара тӏахьийхар цо.
