Хьехархошта юкъе дIайихьача яхьашка котбаьннараш белгалбир
Хьехархошта юкъе дIайихьача Ерригача Россе XX-ча яхьашка котбаьннараш белгалбеш кхетаче хилар дешареи Iилмани гIулакхех йолча Министерстве. ХIара денна берашца къахьегаш, уж нийсача наькъ тIа даха гIерташ дукха низ Iобуллаш хьабоагIаш бола хьехархой гулбеннабар цига. Шер-шера дIакхухьаш йола уж яхьаш юкъеяьхай, лоархIамеча гIулакха тIехьа белгала болаш, къона тIехье ураоттаеш боахкарий оагIув хьаллаца.
«ГIажарий-Юртарча №3 йолча ишкола кулгалхо йолча ГIулой Анжелайна кхаьчар Гран-при. Дешархошта кхетам балара тIехьа цо дIахьош бола болх лоархIаме моттиг дIалоацаш болга белгалдир яхьашка.
Берашцара гIулакх, бувзам боаггIача боараме лелабарах болча оагIонца котало яьккхар ГIажарий-Юртарча №5 йолча ишколе ингалсий мотт хьехача Фаьрганаькъан Жанеттас; Илдарха-ГIалий тIарча №1 йолча гимназе эрсий мотт, литература хьехаш йолча Евкуранаькъан Жарайдата; ГIажарий-Юртарча №5 йолча ишколе наьна мотт, литература хьехаш йолча Келаматанаькъан Азас.
Къонача тIехьен дегашка Даьхенцара, шоай хIаманцара безам чIоагIбарах, цар уйлаш дикагIа долча хIаманца ювзарах болча оагIонца котало яьккхар ГIажарий-Юртарча №5 йолча ишколе зIамагIа долча берашца болх дIахьош йолча ЦIолой Хаде», - дийцар «Сердалога» министерствон болхлоша.
Министра гIонча йолча Мужахой Мадинас белгалдир, хьехархоша шоай болх лакхача боараме хьагойталга: «Хьехархочун оамалашцара турпалал» яхача яхьаша юкъелоац дешархошта сийрда, цIена никъ бовзийташ, Даьхенцара безам цар дегашка чIоагIбеш, шоай истори, культура лархIа, довза уж Iомабеш къахьегаш хьабоагIа хьехархой. Къаьстта оаш хьегаш дола къа лоархIаме да тахан цу наькъ тIа».
