ГӀалгӀай мехка лаьца боахкача нахá, кхадж тасса бокъо лургья
ГӀалгӀайче гӀолла йолча Россе ОФСИН урхалленашка кхадж тассара хьакъехьа, лаьца боахкача наьха бокъонех дийцар, кастлуш Россе Президента хоржамаш дӀахьош хиларца дувзаденна Илдарха-ГӀалан избиркоме. Кхетаче дӀахьош дакъа лоацаш вар ГӀалгӀай Республике гӀолла йолча Россе ОФСИН сага бокъонаш лораяра уголовни-кхоачашдара даькъ тӀа кулгалхочун гӀонча вола Харсенаькъан Азраил.
«Балхаца ювзаенна дӀайихьача кхетачене керттера дийца дош дар, цӀагӀара арабала бокъо ца луш, иштта лоткъам эцача моттигашка, хувцавалара центре лаьца боахкача наьха кхадж тассара бокъонаш лораяр. Кхетаче дӀахьош, доакъашхоша дийцар кхадж тоссаш дӀабахьа безача балхах. Керттера лоархӀаш хиннар дар, кхадж тассара йола оборудовани чулаттаргйола моттиг кийчъяр.
Иштта дийцар кхадж тасса хьабоагӀача наха доаггӀаш дола хьалаш хилийта дезарах, хьалхашка латташ дола декхараш кхоачашде дезарах. Гойтама материалаш хургйола моттиг а кийча хила еза, аьнна, белгалдир кхетаче. ДӀахо хаттараш тохкаш юкъедаьлар кхадж тасса йиш йолча нахага хоам бе безаш хилар, нахага из дӀакхайкадар, уж цу дийнахьа дакъа лаца кийча хургболаш», - аьлар «Сердало» газетага Илдарха-ГӀалан администраце зарбан болх лелабераша.
Юххера а, болх йистебоалаш, дийцача хаттарий чаккхе йир, цига тӀаийцар, кхадж тоссаш дола денош лакхача боарам тӀа дӀадахьара, наьха бокъонаш лораяра, царна паргӀато хилийтара де дезачох.
