Футболах йолча чемпионата 7-ча бӏале котбаьннараш хьакхайкабир мехка
2012-2013-ча шерашка баьрий тоабашта юкъе дӏайихьача футболах йолча чемпионата 7-ча туре котбаьннараш хьакхайкабир тахан мехка. Из хоам «Сердалога» бир футболах йолча мехкарча Федераце. Ше-ше коталонга кхача гӏерташ бар вай футболисташ цу ловзарашка.
«Эккажкъонгий-Юрт» яха тоаба цу дийнахьа ловзаш хиннаеце а, хьалхарбарашта юкъе я. РСШ «Ангушт Магӏалбик» - «Вайнах 3» яхача тоабай къовсам хьалхаръяр котйоалаш чакхбаьлар, «Эккажкъонгий-Юрт» яхача тоабанца нийсъелар из тӏаккха, очкошка хьежача. «Динамо Магас» - «Эскаром» яхача ловзаре котало цхьаннегахьа хиланзар. Динамовцашта аьттув болаш хиланзар из ловзар, 5 очко тӏехьабусаш ба уж, хӏаьта чемпионат чакхъяла бисараш кхо бӏал мара бац», - йоах тхога бенача хоамо.
Бӏарахой Ахьмад (Эккажкъонгий-Юрт) лакхерча лагӏа тӏа латтарех ва, 7 бургац чутохарах, шоллагӏча моттиге Акенжуд Мухьаммад латт («Динамо Магас»), цо ялх бургац чуяьккхай, хӏаьта кхоалагӏча моттиге Дарсиганаькъан Мухьаммад латт («Эскар») , пхи бургац чутоха аьттув баьннаб цун. Пхипха гол чуяьккхарех ба Ӏарчакханаькъан Ахьмад, Янданаькъан Азнаур (РСШ «Ангушт Магӏалбик»).
