Хьакхайкайир радиога гӀолла автомоделеш лелаяра Чемпионатах хьахиннар
Республикан берий технопарка радиога гӀолла автомоделеш лелаяра «Кванто-Драйв-2025 Чемпионата чаккхе хьакхайкайир, яхаш, дийцар «Сердало» газетага цу урхаллен зарбан болх лелабераша.
«Цу йоккхийча яхьашка баьлар 30 гаргга 10-14 шу даьнна дешархой. Уж бар халонна оасах чакхбала безаш кхаь минота. СихагӀа кхаьчар турнир дӀахьочар дешархой. Цига котбаьлар Къоастой Мухьмад, Албохчанаькъан Микаил. ШоллагӀча даькъ тӀа бар Поаланкой Ӏаддал-Малик, Саганаькъан Ӏумар. КхоалагӀча моттиге хилар Йовлой Ахьмад, Тоачанаькъан Мурад», - аьлар хоамо.
«ДикагӀа чубаьннараш» яхача даькъ тӀа Долакха-Юртарча №3 йолча ишкола Жандаранаькъан ИбрахӀима, Мухьмад-Басира тоабо котало яьккхар. «Гома дукхал» яхача даькъ тӀа Йовлой Ӏумара, Адама тобо котало яьккхар, уж бар Ӏаьлий-Юртарча №1 йолча лицеера.
Даькъалабувц чемпионата доакъашхой! Хӏара керда старт дика хийла, хӀара котвалар - совгӀат дахьаш къахьегарах.
