Гӏалгӏайче белгалбир «Дикагӏдар. Ондаргаш» яхача фестивала даькъ тӏа котбаьннараш
«Кванториум» яхача берий технопарке, халкъашта юкъерча фестивала «Дикагӏдар. Ондаргаш» яха толашбараш белгалбаха дӏахьош кхоллама дакъа дар. Цига шоай проекташ гойташ бар Гӏалгӏайчен дӏаболалуш бола кхолламхой. Яхьан чудоагӏаш «Шолже» яхача агрокомплексе кийчйир лаьрххӏа йола къахьегама оагӏув. Доакъашхошта хьалхашка латтар, кхай тӏара ялат чуийца даьнначул тӏехьагӏа, цу даькъ тӏа йиса йоархӏаш, иштта кхыйола баьцовгӏаш чакхйоахаш бола гӏирс вӏашагӏболлар.
«Сердало» газетага ма аллара, къонача тохкамхоша цу яхьашка гойтар технически декхар шоашта мишта довз, из кхоачашде хар. Дӏахо уж хьежар шоай гӏирсаш дара схема, сурташ оттаде. Цу тайпара болх дӏахьош хиларо берашта таро елар шоашта ховш дар балха юкъедаккха, из хьал вӏашагӏдоллара нийса уйла е, таханарча заман гӏирсаш арахецара шоашта хьалхашка латта декхараш кхоачашде.
Реcпубликан яхь дӏахьош, хьалхара моттиг яьккхар «Кванториум» технопарке ӏомалуш йолча Аьстамаранаькъан Сахара, Албохчанаькъан Зубейра, Малсаганаькъан ӏаддала. Шоллагӏа моттиг яьккхар Яндарерча, «Олимп» яхача тӏех хьаькъал долча берий лицея-центра викалаша Доврбиканаькъан Самирас, Малсаганаькъан Амина, Къоастой Фатимас. Кхоалагӏча моттиге латт «Кванториума» цхьаькха тоаба, цу юкъебоагӏаш бар Котанаькъан Муслим, Эрселганаькъан Захӏир, Чуранаькъан Ибрахӏим.
