Вахар хаьдача МВД болхлой дезалашта терко йир мехка
18.03.2026 11:12
«Мехка сагӏа» яхача боламга гӏолла, кхачанца гӏо дергда вахар хаьдача МВД болхлой дезалашта. Из хоам «Сердалога» бир цу моттигера.
«Мехка массайолча кхалешка дӏа-хьа екъа еза хӏамаш дӏакхаьчар тахан мехкарча МВД доазон тӏа. Шоай декхараш кхоачашдеш, вахар хаьдача болхлой 360 дезала укх езача хана «Мехка сагӏа» яхача боламга гӏолла гӏо дергда», - йоах тхога бенача хоамо. Яьшкашка доалл итт кийла дола хьоара гали, 5 кийла йола шекара гали, 5 кийла дулх, 5 литр даьтта, иштта бе-бе ӏовнаш.
Реcпубликерча юртбоахама гӏулакхех йолча министерствос Къаман ганза рузкъах дӏахьош да из беркате гӏулакх.
Белгалде деза, иштта дола кхачан тӏормигаш вай мехкарча кхыболча наха а дийкъалга.
