Берий кхетам лакхбу ишкол хьайийллар вайцига
ХӀара бера кхетам лакхбеш, мах бала ца безаш, керттерча дешара тӀаегӀа ишкол хьайийллар Магасе. «Республикерча берий театрага» хьалхале йолаш вӀашагӀбелла болх ба из. Из хоам «Сердалога» бир цу моттигера.
«Цу беркатеча ишколах лаьца «Даь аллее» къамаьл дир туризмах йолча комитета кулгал деча Цхьорой Мухьмада, берий театра хьалхалатташ волча Цхьорой ИбрахӀима, Магасерча мэра гӀонча йолча Заьзганаькъан Маккас, «НачӀал, кхетам лакхбарах» йолча ишкола кулгал деча Кхоартой ИбрахӀима», - йоах тхога кхаьчача хоамо.
Гулбеннарий самукъадоаккхаш хилар Оздой Адам, ДимаевгӀар Ӏаьла, Эсамарзанаькъан Ӏалаудин, Эккажанаькъан Марина, Базорканаькъан Бэлла, иштта кхыбараш а.
Цхьацца говзанчаша шоаш хӀамаш мишта хьаю гойташ, аниматораша шоай программа хьокхаш, мах бала ца безаш мерза даараш декъаш, дӀаяхар цигара ха. Ишкол хьаелла тӀадиллар юкъарча палатан доакъашхо волча Эсамарзанаькъан Ӏалаудина, мэра гӀонча йолча Заьзганаькъан Маккийна, керда ишкол хьайийллачун нана йолча Цхьорой Хьанифайна.
