ГӀалгӀай мехка хьабийллар, Хоронько Игора суртий гойтам
03.10.2024 00:56
Паччахьалкхен исбахьален музее хьабийллар «Лоаман ГӀалгӀайчен хозале» яха Хоронько Игора гойтам. Из хетабаь ба ГӀалгӀай Республикан 100 шу дизара, яхаш, дийцар «Сердало» газетага ГӀалгӀай Республикан культуран Министерстве.
Ше лоаман ГӀалгӀайче хиннача шин кӀира цо хьакхеллар 30 сурт, цар тӀа хьагойт лоаман Ӏалама хозале, лоаман бовхьаш, гӀалгӀай къаман культуран тӀехьален гӀишлош.
Из гойтам хьабеллаш, цига хилар вай Ӏаьдала болхлой, культуран викалаш, искусство, сурташ дезараш.
Суртанчий болх го таро йолаш ва хӀаравар. Из гойтам дӀахьоргба ардара бетта 31-ча денга кхаччалца. Цига Пушкински карта дараш мах боацаш баха йиш йолаш ба.
