Газах, токах хьаӏайна латтача декхарах дийцар мехка
Доагора-энергетически дешашца дувзаденнарех дувцача гойтама кхетачене дакъа лоацаш хилар вай мехкарча Паччахьалкхен хьалха латта Сластенин Владимир. СКФО Россе Президента массазарча викала гӏонча Надыкто Владимир, иштта Россе токацарча гӏулакхех йолча министерствон кулгалхочун гӏонча Конюшенко Петр вар кхетаче дӏахьош хиннараш. Йоккха терко еш дийцар цига токах, газах тӏалаттача декхарах, из гӏулакх меттадоаладара тӏехьа къахьегарах.
«Таханарча дийнахьа хьаӏайна, дӏадаланза латтача декхара боарамах дийцар кхетаче. Иштта белгалдир, Федеральни оагӏоно, суда пирстопаша, ӏаьдала болхлоша из гӏулакх меттадоаладеш дикка къахьега дезилга. Вай республикагара доклад ешаш хиннар вар суда пирстопий Федеральни моттига мехкарча оагӏон кулгалхо – таханарча республикан керттера суда пирстоп Къоастой Заьлмаха. Судо лаьрхӏар кхоачашдара тӏехьа мехка дӏабихьача балхах, иштта цу оагӏонца дувзаденнараш меттадоаладара тӏехьа юкъелаца дезарех дийцар цо гулбеннарашка», - йоах «Сердалога» мехкарча Паччахьалкхера бенача хоамо.
Белгалде деза, декхар хьагулдара болх укх ах шера кӏеззига дикагӏа болга, бакъда тӏалатта декхар лаьгӏденнадац. Кӏимарса бетта 1-ча денга диллача, газах хьатеха вай реcпубликанна тӏалаттар 10, 8 млрд сом декхар да, токах - 10,1 млрд сом. Бахархошта, ЖКХ моттигашта тӏалатта декхар да из дукхагӏча даькъе.
Из гӏулакх тоадара тӏехьа къахьега дезилга хьалхадаьккхар кхетаче. Суда лоткъамашка гӏолла болх дӏахьош, хьагулде деза декхар.
