СВО ветеранашта гӏо дикагӏа дергда, Ерригача Россе кхетачене ма аллара
Ерригача Россе селектора гӏонца яьча кхетачен юкъе, дакъа лоацаш хилар «Даьхен лорабой» яхача ганза мехкарча филиала хьалха латта Абаьданаькъан Ислам, СВО бӏухошта гӏо дарах йолча республикерча кхела кулгалхо Мархенаькъан Анзор. Гойтама конференцбувзамга гӏолла дӏайихьар кхетаче. Цу гӏулакха хьалха латташ хиннар яр Россе Герзашцарча низий Министерствон кулгалхочун гӏончан статс-секретарь, «Даьхен лорабой» яхача ганза кулгалхо Цивилева Анна.
«Кхетаче дийцар ганза хьалхашка латтача керттерча декхарех, федеральни, моттигерча оагӏонашца бувзам лоаттабарах, тӏема операце доакъашхошта гӏо деш, паччахьалкхенгара хьадоагӏача хӏамах. Къаьстта терко еш дийцар Цивилева Аннас СВО ветеранашта, цар дезалашта терко ярах, тӏема аренашка лозабаьча бӏухошка боаггӏача боараме хьажарах, заӏапхой болча СВО доакъашхой вахара хьал аттачахьа доаккхаш йолча программага гӏолла цар фусамашка хувцамаш дарах, ишттача хьале барашта лаьрххӏа дола барзкъаш ӏалашдарах. Тӏема аренашкара цӏабаьхкача бӏухошта балха отта, вахаре цхьа моттиг хьалаца новкъостал дар, лорий, психологически, юридически оагӏонцара гӏо деш СВО доакъашхошка, цар дезалашка хьожаш хилар йоккха терко е езаш декхар долга белгалдир кхетаче», - йоах «Сердалога» «Даьхен лорабой» яхача ганза мехкарча филиалера бенача хоамо.
Абаьданаькъан Ислама белгалдечох, Цивилева Аннас кулгал деча кхетаченашка гӏолла, болх боаггӏача боараме хьаоттабе аьттув боал филиалий. Моттигерча оагӏонца лакха терко ергья кхетаче белгалдаьрашта. Тӏема операце доакъашхошка хьажара, царна терко яра болх республике кхы а дикагӏа тоабара тӏехьа, къахьегаш хургба хӏара денна.
