Хьунаш цӏерах лораергйола болх вӏашагӏбеллар мехка
17.03.2026 11:32
Хьунашка ювлача цӏерашта духьала кийчо еш ба мехка хьалххе. «Сердалога» из хоам бера цу оагӏонцарча министерствера.
«Рослесхозаца, ЮФО хьун боахама Департаментаца, Авиалесоохранаца цхьана баь болх ба из. Укх бетта 20-гӏа ди отталца вай мехкадас бартчӏоагӏо оттаеш болх дӏахьоргба цу гӏулакхаца», - дийцар тха газетага мехкарча ӏалама гӏулакхех йолча министерстве.
Цу юкъе да хьун боахамаш, цӏаьхха, хила тарлуча цӏерцарча хатарех лорадераш. Моллагӏча хатара духьала боаггӏача боараме кечам болаш хила беза хьунашта тӏахьожам лоаттабераш.
«Экологически паргӏато» яхача къаман проектага гӏолла дӏахьош лоархӏаме болх ба из. Россе Президента Путин Владимира тӏадилла, хан-ханнахьа чакхбоаккхаш ба из болх.
