«ЭтноКэмп: дегӏаахара доазув» яхача кагирхой кхетачен чаккхе йир
Гӏалгӏай мехка чаккхе йир «ЭтноКэмп: дегӏаахара доазув» яхача кагирхой кхетачен. Цу юкъарлон проекто гойтар мехкашта юкъера бувзам лелабара ше пайда луш хилар. Цо Россе тайп-тайпарча моттигашка бахача къонача хьалхале лелаерашта таро елар пайда луш дола къамаьл дӏадахьа, къамашта юкъера хьал тоаде, цхьана болх хьакхолла.
«Цу кхетачен доакъашхой хилар Ханты-Мансийски автономни куран, Мордови Республикан, Лугански Халкъа Республикан, Москван, Ростовский, Амурский, Калининградски, Ленинградски, иштта Россе кхыча моттигашкара викалаш. Цу кхетачен дешара, культуран программа вӏашагӏъеллаяр шоайла говзал эцара, ӏомабара, дийна къамаьл дӏадахьара лаьрхӏа. Доакъашхоша болх бора цига хьабийхача эксперташца, шоаш а дӏахьора яхьаш, говзанча хьехамаш, иштта шоайла къамий культура, ӏадаташ довзар хилар.
Гӏалгӏайчен кагирхошта из моттиг лоархӏаме яр: цу майдан тӏа таро яр лоалахошцара гӏулакхаш тоаде, мехкашта юкъера чӏоагӏа бувзам вӏашагӏболла», - аьлар «Сердало» газетага республикан Миннаце.
Кхетачен болх вӏашагӏбеллача комитета проект лакха боарам болаш хилар. Уж лаьрхӏа ба Президента грантий Фонде дехараш чудала, цо таро лургья «ЭтноКэмпа» географически доазув шерде, цунца къамашта юкъера къамаьл дара даькъ тӏа пайда эца. Карарча хана из проект, Роскагирхой.Гранты.новкъостал а деш, кхоачашъеш я.
