ГIалгIайчен полице 650 совгIа дIахьоарчаяь метадон хьаяьккхар
ГIалгIайчен Шолжа шахьаре зуламхошкара 650 совгIа метадон оала дIоарчаяь молхаш хьаяьхар, яхаш, дийцар «Сердало» газетага мехка бокъонаш лораераша.
«ГIалгIай Республике гIолла йолча МВД наркотикашта тIахьожам лоаттабеча урхаллен болхлоша, ГIалгIай Республике гIолла йолча ГИБДД наькъа ха деча къаьстта йолча батальона викалаша, ГIалгIай Республикерча МВД ВОГ, ГIалгIай Республике гIолла йолча Россе УФСБ болхлошца цхьана шоай болх дIахьош; юхатехар лаьрххIа вIашагIкхийттача зуламхой тоабо дIахьош хинна ийрча гIулакх», - аьлар хоамо.
Шолжерча, ши саг чувахача цхьан цIагIа лаьрххIа чухьежачул тIехьагIа, бокъонаш лораераша хьаяьккхар 625, каьхаташта юкъеехка, кийчъяь хинна молхаш. Экспертизо хьагойтар, уж «метадон» яха наркотикаш йолга, ерригаш а дIалаьрхIача 107, 76 грамм. Полице болхлоша иштта хьадаьккхар токаца леладеш дола тараз, банковски кхоъ карта, кхоъ мобильни телефон.
Белгалдаккха деза, тахан латтача хана, паччахьалкхен структурай болхлоша, лерттIа уйла е ховш болча наха наркотикашца къовсам лоаттабе беза. Из керттера декхар да. Наркотикаша хIалакву моллагIа цу наькъ тIа нийсвенна саг.
