ТӀема операце доакъашхой хиннача Эсамарзанаькъан Руслана, Дзейтанаькъан Микаила вахар хаьдар
Донбассе дӀахьоча тӀема операцена юкъе, шоай декхараш кхоачашдеш латташ, вахар хаьдар вай мехкахой Эсамарзанаькъан Руслана, Дзейтанаькъан Микаила. Къонгаш кхелха, сагото йолча наьха оагӀув хьаллаца баьхкар мехка хьакимаш: Халкъа Гуллама кулгал деш вола ТӀумхой Мухьмад, республикерча тайп-тайпарча моттигашкара викалаш.
«Лакха майрал, денал гойташ, шоай къамах хоза цӀи йоаккхийташ лаьттар Эсамарзанаькъан Руслан, Дзейтанаькъан Микаил. Къаман исторе массахана яхаргья цар сийдола цӀераш», - аьлар ТӀумхой Мухьмада, къонгаш дӀабаьнна гӀайгӀа енача гаргарча нахага кодам бувцаш. Цо белгалдир, мехкарча кулгалхоша цар дезалашта массахана гӀо лоаттадергдолга.
Тхьовра лаьтта шоай дай санна; деналах, майралах бизза бола вай къаман къонгаш боккхача мехка сийле лораеш латт тахан. Вайх хӀаране декхар да, цар цӀераш боча йолаш дегашка йоахаяр! Дала гешт долда байначарна! Дала къахетам болба царех!
