Мехкарча туризма хьал дикка дегӏаухаш латт
Мехкара туризмах йола комитет, республикера цу оагӏонцара хьал тоадеш, болх дӏахьош я. Наха дикка йовзаш йоацача моттигашта терко еш, къахьег цар тахан. Эса готталийя доагӏача моттиге тохкамаш деш ба тахан. Белгалде деза, тӏакхача хала долча уллаш йола моттиг йовзараш дукха боацилга. Диъ сахьата гӏаш никъ беш тӏакхача везаш моттиг я из. Дог тохадолийташ ӏалам да цига хьалкхаччалца гонахьа гуш дар.
«Листа хьун моттигаш, хи тоатолгаш долаш чӏоагӏа хоза ӏалам да цигардар. Цига тӏакхача беш бола никъ хала бале а, гонахьарча хозаленаша атта хетийт из. Туризмаца дувзаденнараш дикка доаржадеш къахьега лерхӏ оаха укх шера. Цу юкъе да керда туристически наькъаш белгалдар, туристий кхерамзлен хьалаца дувзаденнараш чӏоагӏдар. Къаьстта йоккха терко ю наха йовзаш, вӏалла йий ховш йоацача моттигашта», - дийцар «Сердалога» туризмах йолча комитето.
Экологически туризма хьал дикка тоадергда мехка. Вай мехкара вӏалла саг тӏакхачанза йола моттиг туристашта дӏайовзийтара тӏехьа къахьег тахан. Тӏехьа тӏабоагӏарашта ӏалама моттигаш лертӏача хьале йолаш дӏайовзийтар, боаггӏаш бола лерхӏам царца лелабар да эггара керттердарех.
