Гӏалгӏай мехка дӏахьоргба куран тӏара «Бейни-2026» яха туристий гуллам
Гӏалгӏай мохк дӏабахьа кийчлуш я «Бейни-2026» яха куран туристий гуллам. Маьтсела бутт чакхбоалаш, Жӏайрахьа кхален Маьтлоама дукъ тӏа, ерригача Къилбаседа Кавказера 250 профессионал - никъ бара тӏера бола нах гуллургба. Доакъашхошта юкъе хургба туристически даькъ тӏара викалаш: профессионалаш-гидаш, туризмах бола инструктораш, турагентствай кулгалхой, блогераш.
«Из проект - тӏеххьарча шерашка туризм дегӏайоалаяра чубоагӏаш дӏахьоча балха дакъа. Из кеп дегӏайоагӏаш я, цунцара безам совбоалаш ба, тахан «Бейни» Къилбаседа Кавказа боарам тӏа я.
Туристий кхетачен кийчо яра болх лелабераш хьабоагӏаргба республике; цар лелаю тоабаш, вӏашагӏдехк наькъаш, иштта дувц шоай балхах, мехках. Тхона лоархӏаме да, уж вайцига хьабахкарал совгӏа, цар кӏоаргга ӏомадар Гӏалгӏайчен истори, наькъаш, лоаман доазув.
Гӏалгӏайченна из профессиональни даькъ тӏа ялара боарам ба. Вӏашагӏкхетара программа чудоагӏаш да хоза салаӏар, дешара оагӏув. Доакъашхой Маьтлоам тӏа баргба, уж гӏоргба гӏалаш йолча. Цига дӏаяхьа лаьрхӏад экологически семинараш, исторически лекцеш, лаьрххӏа дола говзанча хьехамаш. Спортивни оагӏув а гойтаргья, из вӏашагӏъеллай туристий эстафета тоабашца.
