Эллиной-Румий латарах йола Россе яхьаш дӀахьоргья вай мехка
БӀаьстан шоллагӀча бетта вай мехкарча «Магас» яхача спорта Двореце дӀаяхьа лерхӀ Эллиной-Румий латарах йола, 24 шу даьннача спортсменашта юкъера Россе яхьаш. Из хоам «Сердалога» бир спорта оагӀон болхлоша.
«ХӀара шера дӀакхухьаш йола турнир хетаяь я Келаматанаькъан Ӏалихана. БӀаьстан шоллагӀча бетта 24-ча денгара 28-ча денга кхаччалца дунен яхьашка дӀачубала аьттув луш йолча Россе яхьашка шоай говзал хьахьокхаш хургба латархой», - йоах хоамо. «Иштта йола яхьаш вай мехка дӀаяхьаро хьагойт, регионе спорт дикка яржаш латтилга», - аьлар физически культурахи спортахи йолча министерствон хьалха латтача Белхарой Руслана.
Кердадоаккх, 2018-ча, 2020-ча шерашка вай мехка 18 шу даьннача спортсменашта юкъера яхьаш дӀайихьалга. Ши шу хьалха вӀашагӀъеллар халкъашта юкъера Эллиной-Румий латарах йола турнир. Уж еррига кхетаченаш Росси турпала Келаматанаькъан Ӏалихана хетаяь яр.
