Гӏалгӏай мехка «Дошо гуйре» яха ярмарка хургья
Укх бетта 31-ча дийнахьа Шолже хургья «Дошо гуйре» яха ярмарка- гойтам. Из хетаяь я юртбоахама къахьегамхой профессиональни цӏайна. Мах бу мугӏараш доаржадергда культуран Цӏен хьалхашка, цига Гӏалгӏайчен ахархоша шоай керда хьувкъам гойтаргба. Эцархошта керттера дика да, из маьха 15-20 процент чухьнахьа хилар. Из бахьан долаш, шахьара, юрта бахархой таро хургья, юкъе латташ саг а воацаш, шоай маьхах кхачан даараш эца.
«Юртбоахам - республикан экономикан лоархӏаме цхьа дакъа да. Из хиларах наха хьабе болх ба, цар шоай дакъа юкъедахь кхачан ӏалашон.
Гӏалгӏайче болх беш да фермерий боахамаш, дегӏадоагӏаш да хьайбаш, баьцовгӏаш леладара балхаш. Шоаш хьабаьккха хьувкъам маьхалбаккха таро хиларах, боахамаш кхы а дикагӏа дегӏадоагӏаш да. Ярмарка дӏахьош хилара чудоагӏаш, юртбоахама болхлой безбергба, совгӏаташ лургда «Дикагӏа бола доалахьара боахам», «Зизай фестиваль» яхача яхье котбаьннарашта. Карарча шера яхье дакъа лоацаш хилар 651 саг. Цар къахьегам боккха ба, доалахьара боахам дегӏабаро юртий экономика а дегӏайоалаю, лаьттанцара къахьегам совбоаккх», - аьлар Гӏалгӏайчен кулгалхочо Келаматанаькъан Махьмуд-Ӏаьлас.
Республикан Кулгалхочо баркал аьлар республикан юртбоахама къахьегамхошта, цар цӏена къахьегам белгал а беш.
Къаьстта баркал аьлар Гӏалгӏайчен юртбоахама министра Гаьгенаькъан Мухьмада, иштта юртбоахама Министерствон ерригача тоабанна. Цо лакха мах оттабир ахархой даькъ тӏа къахьегача говзанчашта, уж шоай болх дика бовзаш хиларах, из боахам дегӏабоалабе таро хилар. Цо иштта белгалдир, боахамаша царна новкъостал лоаттадеш хилар бахьан долаш, моттигера юртбоахама продукци арахецараш, фермераш шоай продукци дика маьхалъяккха таро йолаш болга.
