ГӏалгӀай мехка дӀахьоргда «Говзанчий мохк» яха доккха цӀай
Тов бутт чакхбоалаш, вайцига дӀахьоргда «Говзанчий мохк» яха къаман говзанчий, пхьарий цӀай. ГӏалгӀай къаман паччахьалкхен 100 шу дизара хетаяьча кхетачен юкъе дакъа лоацаш хургба ГӏалгӀайчен говзанчаш санна лоалахарча мехкашкара викалаш а. Магасе дӀаяхьа лерхӀаш йола кхетаче дагара яргйоацаш хоза а дика вӀашагӀъелла а хургья.
«ГӏалгӀай паччахьалкхен бӀаь шу дизар республикан исторен чухьа лоархӀаме ха я. Дукха хӀама доагӀа цунна чу дика а во а, бакъда эггара лоархӀамегӀдар да паччахьалкхе хьакхоллар. Вай хьинарца гойта деза воай истори, культура, Ӏадаташ, къаман белгалонаш, вай даьша леладаь,тахан тӀехьенга кхаьча дика гӀулакхаш. Цо ду вай къам шийна тара кхы доацаш, кхычарна нийсса латташ», - аьлар ГӏалгӀайчен кулгалхочо Келаматанаькъан Махьмуд-Ӏаьлас «Говзанчий мохк» яха цӀай дӀадоладалале хьалха.
Цун йоккха программа хургья, из бе-башха ца хеташ саг хургвац республикан бахархоех а иштта вайцига хьабаьхкача хьаьшех а.
