Кхоартой Мурада хетаяь жӀакех йола яхь дӀайихьар мехка
МагӀалбика лоархӀаме вахархо хиннача; йоазонхо, хьехархо, журналист волаш ваьхача Кхоартой Мурада хетаяь хӀара шерара жӀакех йола яхь дӀайихьар, «Къона патриот» яхача МагӀалбикерча моттиге. ХӀанз ялхазлагӀа дӀахьош йолча яхьо гулбир мехкара лакха говзал йола нах.
«Мехкара толашагӀа бола жӀакех ловзараш бар цига хиннараш. Царна паргӀатагӀа хургйолаш, кийчдаьдар деррига. ХӀаравар ше-ше котвала гӀерташ вар. ГӀалгӀай меттала яздеш хиннача Кхоартой Мурада кхоллама никъ байзар гулбеннарашта», - дийцар «Сердалога» МагӀалбикерча администраце. Яхь ворхӀ бӀалах латташ хилар.
Хьалхара моттиг елар лакха говзал гойташ лайзача Доврбиканаькъан Мурада. ШоллагӀча, кхоалагӀча моттиге эттар къонагӀа бола доакъашхой - вежарий Осменаькъан Мухьмад-Башири Джабраили. ЖӀакай вахаре лакха начӀал дола ловзархой кхийнилга хьагойтар цу коталоно. Котбаьннарашта дипломаши совгӀаташи луш, дӀакъаьстар из гӀулакх.
