Шолжа хин моттигашка лостам бе арабаьлар мехкахой, къахьегама шоатта долаш
Шолжа гонахьарча моттигашка лостам бе лаьрхӏа, къахьегама шоатта кхайкадир ерригача республике. «Россе хиш» яхача Ерригача Россе боламга гӏолла дӏахьош болх ба из тахан. Массехк сахьата къахьийгачул тӏехьагӏа, хоалуш куц хувцаделар цу моттигий. 700 гали нувхаш яр ӏаламах дог лазараша хин йистошкара гулъяьраш.
Из экологически болам хьаллаца араваьлар мехкарча Паччахьалкхен хьалха латта Сластенин Владимир, цун хьалхара гӏонча Йовлой Мухьмад, вице-премьер Кокурхой Адам. Иштта цига гулбеннабар Ерригача Россе экологически юкъарча болама «Экосистема» доакъашхой, кагирхой гӏулакхех йола Комитет, «Хьалхарбарий болама», «Цаӏ йолча Россе» хьинардараш, Шолжа шахьарерча кхела депутаташ, Шолжа кхален, Наьсарен кхален, Илдарха-Гӏалий тӏарча, Магаса администрацей болхлой, спорта гӏулакхех йола Министерство, ӏалама гӏулакхех йола Министерство, мехкарча моттигий хьалах дог лазаш бола мугӏарера бахархой, гӏо деш лелараш», - дийцар «Сердалога» мехкарча Паччахьалкхене.
Цу оагӏонцарча министерствос мехкарча моттигий хьал меттадоаладара тӏехьа баьккха хьалхара гӏа мара бац из тахан. 28 километрага кхоачаш йола хин оагӏонцара моттигаш я лостам бе безараш, дикка къахьегаш из болх чакхбаккха лерхӏ мехка.
