Берий Даьхенцара безам чӀоагӀбеш йола Ӏилман семинар дӀайихьар мехка
ГӀалгӀай дезалашкарча берий дегашка Даьхенцара безам чӀоагӀбарах йола Ӏилман семинар дӀахьош хилар мехкара Ӏилма- тохкама институт. Даьхен лорбой шера хетабаь ба из болх.
«Этнологех болча оагӀон болхлой бар семинар дӀахьош хиннараш. Къаман юкъера эггара лоархӀамедараш лорадара тӀехьа, къона тӀехье кхеярца бувзабенна бар болх. ГӀалгӀай этнологех болча оагӀон кулгал деш вола, философски Ӏилмай кандидат Харсенаькъан Борис вар семинар хьайийллар. Ший къамаьла юкъе цо белгалдир, Даьхен лорбой шера къаьстта из тема харжар лоархӀаме долга», - дийцар «Сердалога» ИнгНИИ.
Дезала юкъерча гӀулакхех, эггара чӀоагӀагӀа лархӀа дезарех дийцар цига. ГӀалгӀай къаман культураца, Ӏадатий истореца дувзаденнараш керте оттадеш, дӀабахьа беза болх ба из.
Семинаре гулбеннараша белгалдир, из гӀулакх дӀахо а дикка доаржадеш дӀадахьа дезилга, тахан дувца оттадаьраш вахаре гуш хургдолаш къахьега дезилга.
