1992-ча шера гурахьа хиннача хатара хетаяь кхетаченаш дӀайихьар вай мехка
Наьсарерча «ГӀоазота кашамашка», дӀайихьар доккхача хатара хетаяь керттера кхетаче. Цига гулбеннабар республикерча Паччахьалкхен викалаш, тайп-тайпарча моттигашкара болхлой, дийша нах, цу хатара юкъе байнарий гаргарбараш. Вай Мехкадас Келаматанаькъан Махьмуд-Ӏаьлас тӀадилла, байнарашта тӀера сагӀа луш, Даьла цӀи йоаккхаш, КъорӀа дешаш , жамаӀата ламаз деш, дӀайихьар кхетаче.
Республике мел йолча ишколашка, кхыйолча дешара, болх беча моттигашка дагалаьцар 1992-ча шера шоай фусамех бохабаь нах. Гойтамаш, дагалоаттама урокаш хилар культуран цӀеношка. 70 совгӀа кхетаче яр вай мехка цу деношка байнараш дагалоацаш хиннараш.
«ГӀалгӀай къаман хӀара цӀагӀа байнараш дагалоацаш дола ди да таханардар. 1000 совгӀа адам делар гуйран шоллагӀча бетта 30-ча дийнахьа доладаьча хатара юкъе, 190 саг де доацаш вайнав, 60 000 совгӀа нах шоай фусамашкара беха арабаьлар. Дицде йиш йоацаш, цӀаккха а дагара дӀадаргдоацаш, денош да уж. Из тайпара хатар кхы ца оттийта хьожаш, даха деза вай. Барт, машар латталба вай мехка массахана», - белгалдир Мехкадас, уж денош дагалоацаш.
