Германерча лораша говзанчий хьехамаш дир вай мехка
Магӏалбика кхален дарбанче «тӏера чов зӏамига хургйола вай заман хирургех» бола ӏилман оагӏонцара гойтама болх дӏахьош, вай лорашта цу оагӏонца дувзаденнараш довзийташ хилар Германера кхаьча лораш. Дарбанчен кулгалхоша вай республике вийхав Германера лакха говзал йола лор Барщигов Мовсар. Из вай республике кхаьчав ший тоабанца, цу юкъе ба миашта вола хирург, анестезиолог-реаниматолог, отоларинголог.
«Шин дийнахьа МЦРБ лорашца болх дӏахьош хиннаб уж, кердадараш юкъелоацаш, ворхӏ операци яьй цар. Вайцигарча лорий аьттув бар кердадарашка гӏолла тохкам бе, деррига а ма дарра бӏаргаго, дакъа лаца. Операцеш ярал совгӏа, унахой тӏаийбеш хилар гаьнара баьхка лораш. Миай хирург 118 унахочунга хьежар, отоларинголог - 41 унахочунга, де дезаш дола дарба хьалхадаьккхар цар», - дийцар «Сердалога» мехкарча Минздраве.
Ӏалбаканаькъан Зарас – цу оагӏонцарча министерствон кулгалхочо белгалдир, иштта болх дӏакхахьар чӏоагӏа лоархӏаме, вай лорий говзал лакхъеш долга. Тахан Европейски моттигашка даьржа дола кердадараш довза аьттув ба вай мехкарча лорий, цул совгӏа, царца цхьана операци дӏахьош хилар балха боккха пайда беш да.
Белгалде деза, иштта бола болх вай мехкарча дарбанчешка каст-каста дӏакхухьаш болга. Цу оагӏонцарча мехкарча министерстве къахьегаш ба, Россера санна доазол арахьарча мехкашкара лакха говзал йола лораш вайцига ухаргболаш. Республикерча лорашта, иштта бахархошта хам баь, мах баь варгвоацаш доккха гӏулакх да из!
