Мехкара дешара моттигаш тоаеш латт
24.06.2025 09:32
Ялх ишкол, шиъ берий беш тоаеш, болх дӀаболабаьб вай мехка. Тахан из лоархӀаме болх дӀахьош латта моттигаш: Наьсаре, Илдарха-ГӀала, Эбарга-Юрт, Аршты, Долакха-Юрт, Яндаре.
Из болх чакхбаккха аьнна «Кагирхойи бераши» яхача къаман проектага гӀолла хьакъоастадаьр 400 млн сом совгӀа рузкъа да. Ахкан тӀехьара бутт чакхбалалехь, чакхдаха лерхӀ деррига балхаш; хьехархоша, дешархоша керда дешара шу хозача, паргӀата йолча моттигашка дӀадоладергдолаш.
«Ишколашка, берий бешамашка бӀарчча ди дӀахьу вай бераша, цунга хьежжа, лакхача боараме тоаяь латташ; паргӀата, дика хила еза уж моттигаш. Из геттара лоархӀаме да!» - белгалдир вай мехкадас Келаматанаькъан Махьмуд-Ӏаьлас.
