Гӏалгӏай мехка ерригача Россера дукха альпинисташ гуллуш ба
Гӏалгӏайчен Жӏайрахьа кхалерча «Каьзи» оалача альпинистий лагере, сихбенна болх дӏахьош ба. Саькура бетта 20-ча дийнахьа денз укхаза гуллуш ба дукха альпинисташ, яхаш, дийцар «Сердало» газетага Гӏалгӏай Республикан Кулгалхочун зарбан болх лелабераша.
«Гӏалгӏайченна лоамаш - уж духхьал ӏалама мах бараш хинна ӏац. «Каьзи» альпинистий фусаме берригача мехкара спортсменаш хул. Дӏадахача шера укхаза Россе Чемпионат дӏайихьар альпинизмах хьалхара чакхвалара классах, из йоккха мехка таро я. Спорт, туризм дегӏаахар вайна лоархӏаме да. Хоза хет бераш ӏомалуш бӏаргадайча, шоайла спорта говзал екъаш хилча. Лоамаша вӏашагӏтох тайп-тайпарча къаман нах, таронаш, уйлаш», - аьлар мехка кулгалхочо Келаматанаькъан Махьмуд-ӏаьлас, цу хьалах дувцаш.
Цу майдан тӏа, республикан лоамашка, 100 спортсмен ва российски тайп-тайпарча миӏингашкара, Къилбаседа Кавказера дӏаболабенна Владивостоке кхаччалца йолча моттигашкара вена. Цу тайпарча моттигашка дика ӏалама хьалаш да шоай никъ дегӏабоалабара, керда говзал эцара.
Боккхача гуллама доакъашхой хилар, дӏаболалуш мара боаца альпинисташ а, цар декхарашта юкъе да чоалхане лоам тӏа балар. Лагере массанена лаьрхӏа хьакхеллад дика хьалаш, хӏара альпинист ший низага хьажа йиш, таро йолаш ва шийна фу мог хьажа чоалханеча наькъ тӏа, ший кийчога хьежжа.
