Дай дӏа ца хьожача берашца дувзаденнараш тоаде къахьег вай мехка
Бера бокъонех йолча викала Львова-Белова Марияс видеога гӏолла дӏайихьача кхетаче дакъа лоацаш хилар вице-премьер вола Мутаӏаланаькъан Хьажбикар. Из хоам «Сердалога» бера къахьегама гӏулакхех йолча министерствера. «Кхетаче дийцар 2025-ча шера саькура бетта дӏайихьача Ерригача Россе инспекцеца дувзаденнараш тахан мишта хьаллоацаш да», - йоах тхога бенача хоамо.
Массехк лоархӏамедар чулоацаш ба из болх. Дешареи ӏилмани гӏулакхех йолча министерствос 2026-2028-гӏа шераш чулоацаш дола «наькъашкара карта» кийчдеш латт, дай дийна боллаше, бераш бойлахьа дисар лохдергдолаш. Даьшта, ноаношта болх беш я дагавала йиш йола моттигаш, бераш хьаийдаьрий ишкол, иштта психолого-лорий-педагогически комисси. Цул совгӏа болх дӏахьош я цаӏ йола берий» тешам бола телефон», «Ишколе даха кийчде бер» яха болам, кхыйола, дезалаш хьаллоацаш йола кхетаченаш. Из беррига болх юкъебаьккхаб хӏара бера, кагирхошта терко ергйолаш, цар бокъонаш лораяра тӏехьа, диззача вахарца иразе болаш уж бахаргболаш.
«Мехкарча Паччахьалкхно йоккха терко лоаттаю тахан бера бокъонаш лораяра тӏехьа. Хӏара бер цхьаккха тайпара кхерам боацача, лерттӏача дезале иразе дахийта гӏерташ да оаха мел леладер», - белгалдир Мутаӏаланаькъан Хьажбикара. Кхетаче йистейоалача хана, сага бокъонех йолча федеральни оагӏонцарча викала Львова-Белова Маринас белгалдир, вай мохк ерригача Россе субъекташта юкъе берий моттиг лораяра тӏехьа хьалхарча моттиге латтилга. Из болх иштта дӏабахьар лоархӏаме хиларах дийцар цо.
