Музейшца дувзаденна гӀулакх доаржадеш ба вай мехка
РФ Юкъарча палата, моттигашкарча цун доакъой викалаш кхаьчар мехка. ВӀашагӀкхетара керттера декхар - республике музейшца дувзаденна гӀулакх доаржадар. Из хоам «Сердалога» бир цу моттигера. Москвера, селий мехкара кхаьча хьаьший мехкарча пхе музее гӀолла хьожаш чакхбаьлар, царна юкъе яр Дзейтанаькъан Беслана хьалхале лелаеш вӀашагӀъелла «МагӀалбикера бастион» яха музей.
Тахан Магасе дӀайихьача кхетаче цхьан истола гонахьа гулбелар Мехкадаь, Паччахьалкхен Администраце чухьарча политиках болча оагӀон кулгалду Коазой Мухьмад; шахьара хьалах, моттигий хьал тоадарах йолча РФ Юкъарча палата комиссена хьалхалатта Грушевская Наталья, Луконин Александр, иштта довнаш дӀадахара тӀехьа къахьегаш йолча комиссе доакъашхо Гелисханаькъан Ӏийса, республикерча Юкъарча палата кулгалду Ӏамарханаькъан Лейла, ОП доакъашхо Мартазанаькъан Муса. Музейшкара хьал тоадара тӀехьа юкъедаьккхача дика хургдарех дийцар гулбеннараша.
Докладчика теркалдаьчох, 37 377 мехкара дешара моттиг культуран оагӀонца бувзам болаш я.
Вай мехкара хьал теркалдича, тахан 12 музей, 61 музея цӀалг, 41 музея миӀинг, 3 музея экспозици я. Луконин Александра белгалдаьчох, музейшца бувзабеннача тохкама балхах йолча программашта юкъе геттара кӀезига дакъа лоацаш да мехкара бераш. «ГӀалгӀай мехкара музейш тайп-тайпара я, гуш да, малагӀча оагӀонца берий безам ба.
Кхоллама кружоке ухаш долча бера дахчах е кхыболча гӀирсах цхьацца хӀамаш хьайой, цу гӀулакха хьалхалатта хьехархо ший балхах, берех дог лазаш, шийна могар царна Ӏомаде гӀерташ къахьегаш волга да. Кхоллама балхаш санна, истореца дувзаденнараш а царна дезалургдолаш, лоархӀаргдолаш къахьега деза», - дийцар кхетаче.
