«Наьха вахара хьал аттачахьа доаккхаш, республикера моттигаш тоаеш, къахьег мехка. 2023-ча шера, хьалъе дӀайолайир 64 гӀишло, 46 царех таханарча дийнахьа йистеяьнна, шоай моттиг дӀалаьца я.

Куц тоадеш, эргаяьхай 22 шахьарера моттигаш, укх шера тоае лерхӀ кхы а 20 моттиг», - белгалдир вай мехкадас Келаматанаькъан Махьмуд-Ӏаьлас, баьча балхах дувцаш.

Юрташкара доазош тоадара тӀехьа кхеллача паччахьалкхен программага гӀолла Эккажкъонгий-Юрта хьалъяьй газ, ток, хий лоаттадеш йола моттигаш. Наха лаьрхӀа хьалдеча цӀеной хьал а дикка тоалуш латтилга белгалдир вай Мехкадас. 2023-ча шера 162,6 эзар кв. метрага кхоачаш бар цун боарам. Теркалде деза, 2022-ча шера хинначул 20, 6% лакхагӀа из болга.

«Квартирай хьал» яха оагӀув хьаийцача, вай мехка чӀоагӀа лоархӀаме да, иштта толам боаккхаш болх дӀабахьар. Мехкара вахара-экономически хьал тоадара тӀехьа хьинаре къахьегаш ба республиканна хьалхалаттараш. Вай мехка кулгалхочо белгалдир, наьха вахара хьал ма хетта тоадара тӀехьа дукха къахьегаш дӀадаха дезилга. Ишттача наькъаца мара тоалуц деррига.