«Из гӀулакх вайна тахан геттара лоархӀаме да. Къаман мотт, истори, Ӏадаташ лорадеш бола болх вай тахан тӀатеӀӀа дӀа ца хьойя, кхоана довр кхерам болаш да вай хӀама. Из цхьаккха тайпара хилийта йиш йолаш хӀама дац! Цудухьа кагирхой юкъекхувла беза иштта бола оагӀув хьаллоацаш йолча проекташта, истори дезалургдар, лорадергдар хьалхадаха деза царна», - аьлар вай Мехкадас Келаматанаькъан Махьмуд-Ӏаьлас.

Республикан кулгалхочо теркалдир, ловзара хьисапе луш бола кхетам бераша дикагӀа дӀаэцилга. Из оагӀув хьаллацара тӀехьа теркаме лаца еза этнографически ловзара тара йола проекташ - «ГӀалгӀай мехках дола 300 лоархӀамедар», «Samott» яха мобильни оагӀув, «Дош» яха наьна меттацара безам совбоаккхаш дола берашта лаьрхӀа ловзар.

Мехкадас белгалдаьчох, 2024-ча шера дийнъе лерхӀ «Этнос» яха къаман оамалаш, Ӏадаташ, истори, культура хьаллоацаш йола вахара проект. Из беррига болх вайна эшаш ба къаман лоархӀаме оагӀув - цун истори ийна лоаттадара.