Ворхӏлагӏа ди да Эсо вихьа саг лохаш вола
Гӏалгӏайчен Шолжа кхале ворхӏлагӏа ди-бийса да Эсо ӏовихьа саг лохаш вола, цига оарцагӏбаьлар лахара-кӏалхарваккхара болхлой. Цул совгӏа, цу гӏулакха новкъостал деш ба чоалханеча хьалий боахама кӏалхарбоахараш, волонтёраш, бахархой. Цар хӏара хин километр тохкаш, лохаш болх дӏахьу хиво ӏовихьа моттигера вахархо кораварга сатувсаш», - аьлар «Сердало» газетага Гӏалгӏайче гӏолла йолча Россе МЧСо.
Из хатар нийсдаларах хоам хилар, кӏимарса бетта 21-ча дийнахьа ӏуйрийна, Оалкама йистерча «112 ха тӏарча» Центре. Юххьанца баьча хоамо сиха доагӏача Эса хиво ши маӏа саг ӏовихьав аьлар. Цу дийнахьа, Гӏажарий-Юртарча даькъ тӏара, моттигерча бахархошта царех 68 шу даьнна цаӏ венна коравир. Шоллагӏвар лохаш ва ден-бус.
Из лахара арабаьккхаб Гӏалгӏайче гӏолла йолча Россе МЧСа Керттерча урхаллен чӏоагӏагӏа бола низ. Цига болх беш я лахара-кӏалхарваккхара республикан тоабаш – «Тӏаргим», «Эрше», иштта «ӏарамхи».
Говзанчаша тохкаш я, хӏара гӏа мел боаккха хин моттигаш, иштта дукха кхотаенна гаьнаш йола берда доакъош. Из хьал республикан кулгалхочун, МЧСа теркама юкъе да. Лахара кхетаченашка дика дакъа лоацаш ба юхе ядача юрташкара нах, вайнача сага гаргара нах, гӏашлой тоабаш, цар новкъостал ду хий додача берда йистошкара хьал тахка.
Республикан бахархой шоайла барт хиларах, МЧСа кӏалхарбоахарашца цхьана из болх дӏахьош хиларах, юха ца соцабеш, унзарча моттигашка кхоачаш из дӏабахьа таро я. Из лохаргва коравилцца.
