«Кхетаче дӀайихьар ГӀалгӀай Республикан Ерригроссе халкъашта юкъерча кагирхой союзо, цунна новкъостал даьр яр «Rehab» яха психологически гӀо дара йола клиника; мехка дешара моттигашка наьна мотт дегӀабоалабара, из лорабара маӀан дар цун.

«ГӀалгӀай мотт юхьмарашка, дешашка» яхача викторина доакъашхой бар Наьсарен пхе ишколера: №1 йола гимнази, №1 йола лицей ГБОУ, №2,3 йола юкъера ишколаш, Дошалкъий-Юртара №8 йола юкъера ишкол.

Из кхетаче дӀаяхьара болх вӀашагӀбеллабар тайп-тайпарча халонех латтача ворхӀ даькъах. Дешархошта хьалхашка лаьтта декхар дар, шоаш гӀалгӀай метта, литературан урокаш тIа Ӏомадаьр дагадохар, кхы а довза дезаш дар гӀалгӀай къаман истори.

Коталон моттиг яккха гӀерташ, бераша даьшхар кицаш, цхьаццадолча йоазонашта таржамаш дир, кӀезига довзаш дола дешаш а юкъедоаладир, иштта цар дакъа лаьцар «сиха ха деза хаттар» яхача даькъе, ГӀалгӀайчен культура, тӀема, спорта, политикан викалий цӀераш а хайра», - аьлар ГӀалгӀай Республикан Ерригроссе къамашта юкъерча кагирхой союза кулгалхочо Оздой Инала.

Белгалдоаккх, хьалхагӀа «Сердало» газета яздаьдар, цу тайпарча яхьашка 7-ча класса дешархоша дакъа лаьца хиларах.